अन्तरीक्षमा यात्रा गराउन उड्यो अन्तरीक्ष यान

अन्तरीक्षमा यात्रा गर्न चाहने मानिसहरुका लागि व्यवसायिक उडान गराउने योजना बनाइरहेको स्पेस एक्स कम्पनीले अमेरिकाको फ्लोरिडास्थित केनेडी स्पेस सेन्टरबाट एक अन्तरीक्षयानको सफलतापूर्वक प्रक्षेपण गरेको छ । मानिसलाई अन्तरीक्षको यात्रा गराउनका लागि तयार पारिएको रकेटलाई परीक्षणको रुपमा अन्तरीक्षमा पठाइएको हो ।

यद्यपि उक्त रकेटमा हाल कुनै मानिसलाई राखिएको छैन । मानिसको साटो त्यहाँ एउटा रोबोटलाई राखिएको छ ।

यदि यो रकेटले अन्तरीक्षमा सफल यात्रा गर्न सकेमा स्पेस एक्सलाई अन्तरीक्ष यात्रामा मानिस पठाउने कार्यका लागि नासाले स्विकृति प्रदान गर्नेछ । जसबाट अन्तरीक्ष भ्रमणका लागि मानिसहरु रकेटमार्फत जाने बाटो खुल्नेछ ।

स्पेस एक्सका संस्थापक एलन मस्कका अनुसार अन्तरीक्षको व्यवसायिक पर्यटनको दिशामा यो पहिलो कदम सावित हुन सक्नेछ ।

सन् २०११ देखि अमेरिकाले आफ्नै यानमा कुनैपनि अन्तरीक्ष यात्रीलाई अन्तरीक्षमा पठाउन सकेको छैन । अन्तरीक्षमा अन्तरीक्षयात्रीहरु पठाउनका लागि अमेरिकाले रुसको सोयूज यानको प्रयोग गरिरहेको छ ।

स्पेस एक्सको फाल्कन ९ रकेट तथा ड्रागन क्रू क्याप्सुल इन्टरनेशनल स्पेस स्टेसनसँग मिल्नेछ । यो रकेटभित्र रहेको रोबोटमा लगाइएको सेन्सरले त्यहाँको अवस्था कस्तो छ र मानिसलाई कस्तो परिस्थितिको सामाना गर्नुपर्दछ भन्ने कुराको नियमित रुपमा जानकारी उपलब्ध गराउनेछ ।

उक्त रोबोट अन्तरीक्षयात्रीलाई स्पेस एक्सले रिपली नाम दिएको छ । जुन एलियन फिल्मको एउटा पात्रको नाम पनि हो ।

रकेट लञ्च गरेसँगै स्पेस एक्स कम्पनीका प्रमुख एलन मस्कले भनेका थिए, ‘सन् २००२ देखि यहाँसम्म आइपुग्नका लागि १७ वर्ष लागेको छ । साँच्ची भन्ने हो भने म भावनात्मक रुपमा तनावमा आएको थिएँ, किनकी यो सुपर स्ट्रेसफूल थियो ।’

उनी भन्छन्, ‘हामी नासाको आवश्यकता पूरा गर्ने कुरामा केन्दि्रत छौँ । तर ड्रागन क्याप्सुल ठिक ढंगले काम गरेपछि मात्र हामी आर्थिक रुपमा ग्राहकको खोजी सुरु गर्नेछौँ । नासाको रबैया यस मामिलामा सकारात्मक रहेको छ ।’ एजेन्सी

from Online Khabar https://ift.tt/2Ts8CDd
via IFTTT